ايه ده تخيلى سيدنا محمد دلوقتى بيخبط على بيتك!!!....هتعملى ايه؟!!

الكلام دلوقتى موجه للبنات:
تخيلى نفسك كدة قاعدة مع واحدة صاحبتك فى بيتها , لسة جايين من خروجة جامدة جدا جدا مع ناس جامدة جدا جدا , روحتو عندها وقاعدين عاملين جو مايتنسيش
مشغلين مزيكا تحفة وعاملين دوشة والجيران ودنهم هتتخرم من صوت المزيكا وانتو ماعندكوش مشكلة فاتحين التليفزيون على قناة اغانى ماشاء الله الفيديو كليب شغال وانتو شغالين معاه .
حلو كدة ؟ تخيلتى معايا؟
تخيلى الباب بخبط وانتوا قاعدين ..
مين مين انا محمد رسول الله
هتقولى عليا عبيطة؟ ايه اللى جاب سيدنا محمد فى الموضوع ؟
مانا اهو كنت لسة بقولك .. تخيلى معايا..
المهم ... نرجع لمرجوعنا .. تخيلى معايا..
انا محمد رسول الله , المفروض انك صدقتى وان انتى هتفتحى عشان احنا بنتخيل
طبعا فرحتو جدا جدا دانتو زاركو النبى يعنى مفيش احسن من كدة ضيوف قمتوا جريتوا على الباب عشان تفتحوا للحبيب , مرة واحدة وقفتى انتى وصاحبتك وبصيتوا لبعض ... فى ايه ؟ وقفتوا ليه؟
افتكرتى انك لسة بلبس الخروج اللى انتى مش هينفع تقفى بيه قدام الحبيب جريبتوا غيرتوا هدومكوا بسرعة ولبستوا لبس واسع وحجاب صحيح وروحتوا على الباب ... ايه وقفتوا ليه تانى؟ ااااه نسيتوا تشيلوا الميك اب اللى ماتحطهوش عروسة اجروا بسرعة اغسلوا وشكوا
خلاص الميك اب اتشال؟ وشك ظهر جماله الطبيعى؟؟ يللا بينا نستقبل الحبيب عليه الصلاة والسلام ... لكن ... المزيكا اللى خرمت ودان الجيران هتعملى فيها ايه؟ بسرعة روحى اطفيها ... وما تنسيش تقولى لصاحبتك تغير قناة الاغانى اللى على التليفزيون وتجيب قران او قناة دينية او حتى كارتون .
استنى .. قبل ما تفتحى الباب اقفى وفكرى مع نفسك شويه كدة فى حاجة تانية هتتكسفى منها؟ صورة مطرب على الحيطة , شرايط اغانى كتييييير , المصحف اللى مترب عشان مابيتفتحش ........ اى حاجة.
طب فكرى كدة.. حاسة بإيه؟ متضايقة من نفسك؟ مكسوفة من نفسك ؟ من الرسول؟ طب ايه نظامك مع ربنا؟ اذا كنتى عملتى كل ده عشان الرسول هيشوفك كمان دقيقة .. عملتى ايه بقى عشان ربنا اللى شايفك اربعه وعشرين ساعة فى اليوم و ستين دقيقة فى الساعة ومابيغفلش عنك خالص؟
خلاص ؟ كدة تمام ؟ نفوق بقى وكفايه تخيل وهننزل على ارض الواقع
معايا؟ وصلتوا كلكم؟ الحمد لله
هذا الموضوع منقول على لسان بنت مثلكم