يوميات مدرسه اجن من الطلبه

الموبايلات
الله يخرب بيت اللى اخترع الموبايلات
و لا بلاش الله يخرب بيت اللى اخترع الموبايلات ام كاميرا
و لا بلاش اهى بتنفع برضه
طب نخليها ايه ؟
الله يخرب بيت اللى شيل العيال الصغيرة الموبايلات
كفايه دعا على الناس بقى و خلونى احكى لكم اللى حصل قبل ما تقولى عليا مفتريه و لا حاجه يعنى
الحكايه يا اخوانا بقى
انى قاعده فى امانة الله فى المعمل لا بيا و لا عليا
و الله زى ما باحكى لكم كده
مش ناوية على الشر و لا الاذية و لا اى حاجه
قاعده فريش مشغله اليسا و عايشة فى مود زى العسل
اقوم الاقى ايه بقى
الاقى حسام باشا بتاع 3 / 4 جايلى يسلم عليا
ازيك يا ميس
اهلا يا سمسم . ايه اللى جابك خير
ما فيش كنت عايز افرجك على حاجه جامده اصلك حبيبتى
ماشى يا سيدى هاتفرجنى على ايه
بس احلفى الاول ما تقوليش لحد
مش هاحلف يا حبيبى
لا احلفى و انا هاوريلك
هى مصيبة مش كده
يعنى
طب خلاص ورينى و لو قدرت استحملها و ما كانتش بلوه جامده يعنى اوعدك ما اقولش لحد
لا يا ستى العيال هاياكلونى لو عرفوا انى وريتها لك
يا سيدى ما تقلقش لو على كده مش هاقول مين اللى قاللى
لا هاتقولى
لا و الله ما هاقول عليك حتى لو عذبونى
يا ميس هو انا تايه عنك ده انتى هاتقرى من اول قلم
قلم . ماشى يا سمسم ميرسى قوى و على العموم مش عايزه اشوف حاجه
يا ميس ما اقصدش حقك عليا وبعدين ما ينفعش يبقى معايا حاجه حلوه كده و ما تشوفيهاش
ثوانى ما حدش يفهمنى غلط و لا مخه يروح لبعيد اصبروا لما تعرفوا هو ورانى ايه
قلت له طب ورينى بقى و اخلص
ماشى يا ميس اتفرجى بقى و ادعى لسمسم حبيبك
ربنا يهدك يا حسام ادينى دعيت لك اهوه اخلص بقى
ماشى مقبوله منك . اتفرجى
و شغل لى الفيديو اللى مصوره
و لكوا ان تتخيلوا الصدمه اللى اتصدمتها
لقيت مصطفى زفت اللى فى تالته اعدادى واقف فى الفصل عند البورد و قدامه واقف مستر احمد بتاع الزراعه و مصطفى ده واقف فى وضع الاستعداد انه يضرب مستر احمد بالقفا
و فيديو تانى ماسك العصايا و عامل انه هايضربه على ضهره
و فيديو تالت عامل له فيه قرنين
هو شهادة حق مستر احمد ده شخصية لزجه و يستاهل كل اللى يجرى له و بينى و بينكم كنت هانسى انى ميس و كنت هاضحك بقى و اقول للواد ابعتها لى لكن ربنا فوقنى فى اخر لحظه و افتكرت انى لازم اخد موقف من الواد و ازعق بقى و اكبر الحكايه ما هو اللى اتعمل فى احمد بطيخه ( سورى المدرسة كلها بتقول عليه كده ) ممكن يتعمل معانا و احنا مش دريانين
قولت له مين اللى مصور الفيديوهات دى
ليه
انا باسال سؤال واضح ما يتردش عليه بليه
طب ما انا اعرف هاتعملى له ايه
و انت مالك بقى
و انا مالى ازاى و بعدين ما حضرتك وعدتينى
لا دى مافيهاش وعد الموضوع لما يبقى كده يبقى ما ينفعش فيه وعود
يا ميس
حسام اخلص و قولى مين اللى صور . انت ؟
لا والله
امال مين
كريم علاء
ماشى
هاتعملى ايه
مالكش دعوه
يا ميس لو عرفوا اللى انا عملته هايعملوا معايا مشكله و حضرتك ما يرضكيش اخسر اصحابى و بعدين ما هو مستر بطيخه يستاهل الصراحه ده راجل غلس
حسام عيب كده . و بعدين زى ما انتوا شايفينه غلس و عملتوا فيه كده اكيد غيرك شايفنى غلسه و ممكن يعمل معايا انا كمان كده
لا يا ميس احنا بنحبك و الله
خلصنا اطلع بقى البريك خلص
اوكى يا ميس بس بلاش تكبرى الحكايه
ماشى اطلع بقى
قعدت محتاره مش عارفه اعمل ايه لو كبرت الحكايه الواد حسام هايتاذى فيها و لو طنشت العمليه هاتبقى سبهلله و العيال هاتستهبل اكتر و اكتر
المهم قررت اخد موقف و طبعا ما رضيتش الجا لسحس بمب لان الحكايه كانت هاترسى فى الاخر انه هايعمل نبله بأساتك و لبان و يضربهم بيها
روحت خدتها من قصيره و دخلت لمستر محترم و راجل كبير و حكيت له الحكايه كلها من طقطق لسلاموعليكو بس مارضيتش اقوله على حسام خفت لايقول عليه
و المستر مسك الفصل كله ظبطه و لاقاهم كلهم منزلين الفيديوهات على موبايلاتهم
و طبعا مسك مصطفى اداله اللى فيه النصيب و مصطفى قال على كريم و الاتنين اطظبطوا صح و الفصل كله اتحرم من حصة الالعاب اسبوعين كاملين
شوفتوا القسوة
و لما العقاب ده ما عجبنيش و حسيت انه قليل المستر قاللى انه ما ينفعش نعمل اكتر من كده عشان مستر بطيخه ما يعرفش و يزعل و بلاش نحرجه و قاللى انه بيدى العيال دى دروس خصوصيه و عارف اهاليهم و هايقول لهم يبطلوا يبعتوا معاهم موبايلات تانى و لو ضرورى يبعتوها معاهم تبقى من غير كاميرا و قاللى احنا بقى من ناحيتنا نمنع الموبايلات فى حصصنا و اللى يقفش موبايل ياخده
و اتفقنا كلنا على كده
طالعه انا فصل 3 / 1 و باكتب فى امانة الله لقيت صوت ما عجبنيش فباضرب بطرف عينى فجأه لقيت 3 عيال نايمين تحت الديسك و فى ايدهم موبايل
روحت رايحه لهم و مديت ايدى و ما نطقتش
فى ايه يا ميس
الموبايل
موبايل ايه
الموبايل بدل ما تلاقى ايدى بتسلم على قفاك يا حبيبى
حاضر و راح مدينى الموبايل
بابص على الموبايل لقيته كله حاجات زباله زيهم
موبايل مين ده و انا باحاول احافظ على هدوئى
طارق
روحت غصب عنى ضارباه على وشه بالقلم . اطلع لى بره
ليه ؟
اطلع بره
حاضر بس عايز اقولك حاجه
مش هامسك نفسى اكتر من كده اطلع بره خلينى اكمل الحصة و بعد كده نبقى نتكلم
و انتوا بقى قوموا اقفوا فى اخر الفصل على ما اخلص الحصة و بعد ما خلصت خدوا اللى ربنا قاسمه لهم
و شرحت الدرس و انا مش عارفه اعمل للواد ده ايه
المهم بعد ما الحصه خلصت طلعت له بره لقيت المستر اللى عليهم جاى
فكرت اقوله بس اتكسفت
قولت له انا عايزه طارق بيه بعد اذنك
اتفضلى يا ميس ان شا الله تاخدى الفصل كله
قبل ما اتكلم ابتدى يعيط
روحت مدياله القلم التانى . على الله تعيط مش عامل فيها راجل استرجل بقى للاخر
يا ميس طب حضرتك مش عايزه تسمعينى يعنى ادافع عن نفسى ازاى
ما تدافعش بعد اللى شوفته مش مستنيه اسمعك يا بابا
طب و الله الموبايل ده بتاع بابا
كمان
و الله بتاع بابا
و الحاجات اللى عليه
بتاعته
حلو قوى ادينى رقم ابوك بقى
ليه
ييجى ياخد حاجته و ياخد الدوسيه بتاعك بالمره
يا ميس
معلش يا ابنى اصل المدرسه دى بتاعة الناس المحترمة و اللى اهاليهم محترمين لكن مادام ابوك راجل مش محترم و ما دمت طالع من بيت و بيئه قذرة كده يبقى انت ما تلزمنيش فى المدرسة هنا
يا ميس و الله الحاجه دى بتاعته
مصدقاك من غير ما تحلف هو فيه حد هايقول على ابوه انه راجل سافل و زباله و قليل الادب و هو مش كده يا ابنى اللى زى ابوك ده هايربيك ازاى يعنى اكيد تربية واطيه يبقى مكانك مش هنا مكانك فى الشارع مع اللى زيك
مع ان لو جيتوا للحق المدرسة لمه شوية عيال العن من اطفال الشوارع
يا ميس لو عرف هايقتلنى
و ايه يعنى ما هو ده اللى انا عايزاه
ابوس ايدك يا ميس و الله اخر مرة و الله ما هكررها تانى
و لا كلامك ده كله يفرق معايا
و النبى يا ميس
اخرس ابوك هاييجى ياخد حاجته يعنى هاييجى
و الله هايموتنى
فى داهيه
و لسه باتناقش معاه لقيت سحس بيقول لى فى ايه
مافيش حاجه لانى عارفه انه مش هايعمل حاجه هى عادته و لا هايشتريها
امال الواد ده بيعيط ليه
ربنا ياخده
لا من غير ما تدعى عليه يا ميس كده مايصحش
ما يأيه و طبعا اتسحبت من لسانى اللى عايز قطعه و قولت له فى ايه و اديته الموبايل
كده برضه يا طارق انت تعمل كده
و الله يا مستر اخر مره
اتفضلى حضرتك يا ميس و انا هاشوف الموضوع ده
يا مستر بالله عليك ما تعديش الحكايه دى
لا اعديها ازاى ده اكيد هايتعاقب
لا انا مش عايزاه يتعاقب انا عايزه اشوف ابوه عايزه اشوف الراجل اللى ربى باسكيت الزباله ده
اكيد يا ميس بس حضرتك ريحى نفسك
و جايه انزل قولت التفت اشوفه هايعمل له ايه لقيته حاطط ايده على كتفه و بيسمعه باهتمام فظيع . الراجل ده عايز يشلنى
اه صحيح يا ريت ماحدش يقوللى العيال فى السن ده عايزه تتصاحب
لا الواد ده بالذات مش اول مره يتنيل يغلط ده على طول كده لدرجة ان المدرسين مسمينه طارق بلاوى . يعنى ده بالذات عايز الحرق بجاز
المهم اليوم عدى و حصة ورا حصة لغاية ما اليوم خلص
و لقيت الواد مروح ندهت له
طارق
نعم
ابوك فين
ماجاش
مش انا قولت يجيي لى و بعدين هاتروح من غير موبايله ازاى
لا ما مستر حسين ربنا يخليه اداهولى
و لقيت سحس جاى خلاص يا ميس انا شديت ودنه و قاللى مش هايعمل كده تانى
شديت له ايه ؟
انا بقى كان نفسى اقطع ودانهم هما الاتنين عشان ما يشوفوش تانى .
حسبى الله و نعم الوكيل