يوميات مدرسه اجن من الطلبه

زائر

تسلمي يا جارة القمر تقبلي مروري

ميرسي يا برنس لردك ومرورك

نورت التوبيك

امتحان نص السنه
ياه أخيراً التيرم خلص و جت امتحانات نص السنه
و حسيت انى اخيرا هاستريح منهم
اسبوعين اجازة الحمد لله يا رب
امتحان الكمبيوتر يوم الاربعاء
طب و ماله
لقيت يوم الثلاثاء يا مؤمنين امة لا اله الا الله جايه المعمل
الامتحان بكرة يا ميس
اه ما انا عارفه
يا سلام ما انا عارفه . طب هانعمل ايه
هاتعملوا ايه يعنى ايه هاتمتحنوا طبعاً يا تحف
و النبى . ما احنا عارفين اننا هانمتحن الامتحان هاييجى فيه ايه بقى
هاييجى فيه ايه ؟ هاييجى فيه اللى احنا خدناه
اه اللى هو ايه يعنى
انتوا بتستهبلوا و لا ايه
لا و الله ما بنستهبلش احنا هانمتحن فى ايه
يا نهار اسود انتوا جايين النهارده تسألونى هانمتحن فى ايه
امال نسألك امتى ما هو مافيش قدامنا وقت الا دلوقتى
دلوقتى ازاى
لأ و ما تاخديش راحتك قوى
يعنى ايه
يعنى لسه عندنا درس رياضه
رياضة
امتحان الهندسة بكرة
و انتوا ان شاء الله هاتذاكروا كمبيوتر و لا هندسة
هندسة طبعاً
امال جايين لى ليه
يعنى لو لقينا عشر دقايق كده نبقى نذاكر ايه بالظبط يعنى نركز على ايه من الاخر
اه عشر دقايق لأ ما تذاكروش حاجه
يا ميس و النبى مش وقت هزار
انا برضه اللى باهزر عشر دقايق ايه اللى هاتلموا فيهم المنهج انتوا اتجننتوا
طب نعمل ايه ؟
بصوا فين الورق اللى انا قلت لكم صوروه من المكتبة و ذاكروا منه
معانا اهوه صورناه
طب كويس قوى الورق ده انا ملخصة لكم فيه المنهج اوكى
طب اوكى يعنى نذاكر الورق ده بس
اه بس انتوا هاتعرفوا تذاكروه لوحدكم
مش عارفين
طب بصوا تعالوا نراجع الورق سوا
بسرعه طب بالله عليكى يا ميس عشان درس الرياضه
ماشى يالا بقى عشان نلحق نخلص
هانقعد فين
هى دى مشكله شوفوا اى فصل فاضى نقعد فيه
طب تعالى نطلع الدور الأخير ده فاضى خالص
الدور الأخير فاضى خالص بينى و بينكم خوفت اطلع معاهم لحسن يعملوا فيا مقلب و يرمونى منه و خصوصا ان المدرسه ما كانش فيها حد غيرنا
قلت لهم لأ ادخلوا الفصل اللى جنب المعمل اقعدوا فيه
يا ميس ده فصل ابتدائى و الديسكات قصيرة و ضيقة قوى
اذا كان عاجبكم يالا ادخلوا بقى
و قولت لزمايلى من باب الاطمئنان يعنى يبقوا يشقروا عليا كل شويه
و دخلت الفصل لقيتهم قاعدين ساكتين
العيال تتحسد النهارده
يالا ما هو عشان مصلحتهم لازم يسكتوا طبعا
بصوا بقى افتحوا معايا الورق نراجعه من الأول
لقيت الورق كله مفتوح على اول صفحه
فى ايه يا تحف هو احنا هانراجع الغلاف
ايه
اقلبوا الورقه الأولى يا نهار مش فايت امال هاتمتحنوا ازاى بس صبرنى يا رب
كلكم معايا
اه
و ابتديت اراجع معاهم الورق
لأ ده كتير قوى يا ميس
ما هو ده المنهج يا حبيبى
لأ المنهج ده كبير قوى اختصرى يا ميس
حاضر يا حبيبى اختصر انا فى الشرح و يختصروا هما فى الدرجات ماشى
لأ كده مش هاينفع انا لازم اجيب الدرجه النهائيه
تجيب ايه يا حسام . احمد ربنا لو نجحت اصلا
يا ميس حرام عليكى ليه الاحباط ده بس
يا ابنى احباط ايه ده واقع
واقع
اه واقع انت مش واخد بالك انك طول السنه مقضيها استهبال و جاى دلوقتى عايز تلم المنهج فى عشر دقايق
ما هو البركه فيكى بقى
لا يا حبيبى انا مش هادخل امتحن بدالك
فكك دلوقتى من موضوع الامتحان هابقى اقولك حلها بكرة خلينا دلوقتى فى الكلمتين اللى هايتذاكروا
ماشى يا نكد ركز بقى و بطلوا تضيعوا وقت عشان تلحقوا تروحوا تذاكروا
و بعد ما خلصت مراجعه روحوا
تانى يوم كانت لجنة الكمبيوتر تانى لجنه
لقيتهم نازين لى بعد امتحان الهندسة
هه هانعمل ايه فى الامتحان
يادى النيله مش قلنا هاتمتحنوا
طب افرضى فيه سؤال وقف معانا
و انا مالى
لا و انتى مالك ازاى ده انا اخطفك يا ميس
طب و لزمتها ايه ميس بقى ما ترفع الالقاب يا راجل ما دام هاتخطفنى
لقيت ولد اتحشر و قاللى ثانية واحده يا ميس ما ترديش حضرتك
و لقيته بيجيب الواد من صدره
اعتذر لستك يا كلب
احمد
ثانية واحده بس اصل دى عيال ناقصة تربيه و انا عارفهم عايزين ياخدوا بالجزمة
ولا يا احمد انت اتجننت
يا ميس ثانية واحدة ده واد واطى اعتذر لها يا زفت
انا اسف يا ميس
يعنى هو لو ما كانش مسكك ما كنتش هاتعتذر
و الله باهزر معاكى ده انتى حبيبتى
ماشى بس برضه زعلانه منك
لا و النبى ما تزعليش ده انا داخل على امتحان
ماليش دعوه
خلاص بقى عشان خاطرى ادعى لى
ماشى
يا ميس و النبى مش وقت زعل دلوقتى هانعمل ايه لو سؤال وقف معانا
طب انا هاعمل لكم ايه
شوفى هاتقفى فين عشان نقولك السؤال و تحليه
اقف فين ليه ان شاء الله هو انا هاغششكم
طب ما كل المدرسين بيعملوا كده
و انا مالى
يا ميس دى اول سنه الكمبيوتر يتضاف على المجموع خليكى معانا و النبى
يا ابنى ما ينفعش
يا ميس بقى عشان خاطرنا
مش هاغششكم
هو احنا بنقول الامتحان كله احنا بنقول لو نقطه طلعت صعبه يعنى
الله اما طولك يا روح طب استناكم فين
مستر توفيق بيستنانا فى الحمام
فى الحمام أه
اه ايه رايك بقى
حمام ايه
حمام ايه ازاى
انهى حمام يعنى
التلاويتات يا ميس
معلش اصلى لسه ما استفقدتش المكان كويس قولولى انهى حمام فيهم
الحمام اللى فى الدور اللى فوقينا
حمام الصبيان
ايوه طبعا
طب و انا هاستناكم فيه ازاى يا شوية بهايم
اه صح ده حضرتك ميس
لا يا راجل انت لسه واخد بالك
معلش يا ميس ما خدتش بالى و الله
راح احمد قال لى مش قلت لك دى عيال واطيه ادخلى يا ميس حضرتك المعمل و احنا هانحل و ربنا معانا
ماشى يا حماده بس ابقوا طمنونى لما الامتحان يخلص
اكيد يا ميس مش هانروح غير لما نفوت عليكى
ادعى لنا يا ميس
ربنا معاكم
من قلبك يا ميس
وجع فى قلبك غور على اللجنه بقى
ماشى
بعد الامتحان لقيتهم نازلين فرحانين الامتحان كان سهل قوى يا ميس
يا سلام
اه و الله الامتحان كان جميل و حليناه كله
طب برافو الحمد لله
نشوفك بقى لما النتيجه تطلع سلام يا ميس
سلام
و اخدت اجازة اسبوعين كانوا من اسعد ايام حياتى
و الحمد لله النتيجه طلعت جميلة و كتير منهم جابوا الدرجه النهائية

اصل انا ميس جامده و لا حد عنده اعتراض على كده يوميات مدرسه اجن من الطلبه - صفحة 4 Nunu0000

[size=12]ايه رأيكم فى النهاية السعيده دى

ده التيرم الأول بس
لسه التيرم التانى

[/size][/center]

زائر

الحمد لله لنجاحنا

اكيد دى مدرسة المشاغبين انا عمرى معملت حاجة فى مدرسة ولا مدرس عليا كنت بحترمهم تقبلى مرورى جاره القمر

البرنس كتب:: الحمد لله لنجاحنا

ميرسي يا برنس لردك ومرورك

سندريلا كتب:: اكيد دى مدرسة المشاغبين انا عمرى معملت حاجة فى مدرسة ولا مدرس عليا كنت بحترمهم تقبلى مرورى جاره القمر

دا موجود في كل المدارس وخصوصا مدرسه الولاد

ووصلت ان المدرسين بيخافوا يدرسوا للطلبه

وميرسي يا قمر لردك ومرورك

التيرم التانى
رجعنا من الاجازة و الحمد لله
كانت اجازة حميله تخيلوا معايا كده اسبوعين من غير ما اشوف حبايب قلبى
كنت حاسه انى هاتجنن من الفرحه
المهم رجعنا للقرف و وجع القلب و الهم و الغم من جديد
هى هى نفس الخلق و الأشكال ما فيش حاجه اتغيرت
المهم دخلت الحصة
هييييييه الميس جت
وحشتينا يا ميس
و انتوا كمان طبعاً
طب بذمتك يا ميس مش كنتى هاتتجننى من غيرنا
طبعاً الا كنت هاتجنن كنت هاتجنن من السعاده يا اهبل
لا يا ميس بجد مش كان نفسك تشوفينا
امال ده انا حياتى كانت سودا من غيركم
المهم خلينا فى الحصة بقى
لا حصة ايه ده احنا الحمد لله نجحنا
اللهم طولك يا روح ابتدينا القرف . نجحتوا فى التيرم الأول يا حبيبى انا دلوقتى باتكلم فى التيرم التانى
يا ميس ما الأول زى التانى
زى التانى ازاى
يعنى احنا التيرم كله كنا بنهزر و نلعب و حضرتك حارقه دمك على الفاضى و بعد كل ده نجحنا برضه و قفلنا الدرجه يعنى دماغك بقى يا ميس
يا ابنى ما ينفعش ما هو لو عليا اولعوا بجاز لكن ما ينفعش
يا ميس مالناش دعوه مش عايزين ناخد حاجه بقى دى اول حصة فى التيرم اعتقينا بقى
يا ابنى و انا باعذبكم
يا ميس بقى خلينا نقعد نحكى مع بعض شويه عن الأجازة
اه صحيح يا ميس قضيتى الأجازة فين
فى البيت
ما كنتيش بتخرجى ليه
و انت مالك
فضفضى يا ميس فضفضى و سيبك من الدرس قوليلى بس ما خرجتيش ليه
انت هاتشاركنى يا زفت
الحق عليا عايز اطمن عليكى
ايوه الحق عليك طلعوا الكشاكيل بقى
كشاكيل ايه
يا صباح الاستعباط كشاكيل العربى يا حبيبى
ايه ده يا ميس هو حضرتك بقيتى تدى عربى
اه يا حبيبى عقبال املتك
الله يخليكى يا ميس
طلع يالا انت و هو الكشاكيل
معناش كشاكيل طبعا
ليه ان شاء الله انتوا مش عارفين الجدول
اه عارفينه بس عادى بقى بنستهبل
اه بتستهبلوا انزل يا عمر هات لى الخرطوم
ليه
هارش الزرع
نعم
هاستهبل انا كمان
يا ميس بعد الشر عليكى من الاستهبال
مالكش دعوه يا بارد قوم يا عمر هات لى الخرطوم
على الله تقوم ياض يا عمر
نعم
يا ميس خرطوم ايه بس احنا فيه بينا الحاجات دى برضه
احنا مافيش بينا غير الحاجات دى قوم يا عمر
ما تقومش يا عمر
قوم يالا انت هاتسمع كلامه
يا ميس حضرتك هاتتسببى فى حرب كده
حرب مش كده . طب قوم يا عمر و ابقى ورينى هاتعمل ايه
طب عليا الطلاق ما هو نازل اتسببى بقى فى خراب البيت و تشريد العيال
الطلاق اه طب انزل يا عمر و انت تعالى بقى
و روحت جايباه من التى شيرت و شديت شعره و كنت هاعضه بس باقرف فزغدته فى كتفه و ضربته بالرجل فى رجله
اه بالرجل تشرد بقى و بعدين العيال دى ما ينفعش معاها غير كده هاعمل ايه يعنى
عمر بيبص لى قولت له هاتنزل و لا اديك بالجزمه انت كمان
راح جرى على تحت
فى ايه يا سنه تالته انتوا اتجننتوا و لا ايه و لا دى غلطتى عشان من ساعة ما دخلت باهزر و اضحك معاكم باحسبكم عقلتوا لكن الواضح انكم مش هاتتغيروا ابدا
كان عمر طلع بالخرطوم
روحت واخداه من ايده و هبدت بيه السبورة طلعوا الكشاكيل يا شحط انت و هو و اكتبوا ورايا جاتكم البلا فى مناظركم
يا ميس يا ميييييييييييييس
عايز ايه يا خالد
انا جبت 10 من 10
مبروك يا حبيبى كمل كتابه بقى
حاضر
و رجعت اكمل كتابه
يا ميييييييييس
نعم
انا جبت عشرة من عشرة
برافو يا خالد ما انت لسه قايللى
ما انا بافكرك لتكونى نسيتى
لأ فاكرة يا متخلف كمل كتابه بقى
و رجعت اكتب تانى
يا مييييييييييييييس
ايه
انا بافكرك بس و لا نسيتى تانى
لأ لسه فاكرة يا حبيبى اكتب بقى و عارف لو ندهت لى تانى هاطين عيشتك
رجعت اكتب
يا ميييييييييييييس
عايز ايه يا طارق
خالد جاب عشرة من عشرة
بجد مبروك لابنك يا حبيبتى عقبال الباقى يا ام خالد
ما تتلموا بقى الله يخرب بيوتكم
و رجعت اكتب تانى
لقيت خالد بينده تانى يا ميييييييييييس
روحت بصيت له و قلت له لمبى دى شهادة وفاة بابا
و الله خدتيها من على طرف مناخيرى
نعم
اصل انا اخنف يا ميس
ماشى يا تحف اهمدوا بقى خلونى اكمل كتابه مش عايزه اتغابى عليكم
ما تقدريش اصلا
نعم
لأ ما تقدريش عشان ما نهونش عليكى
اه باحسب
لأ خللى الحساب عليا و كملى انتى كتابه
ماشى يا لمض كملوا كتابه بقى
لأ مش عايزين نكمل كفايه بقى
كفايه ايه اتقوا الله فيا بقى انا تعبت
سلامتك يا ميس بس برضه مش هانكمل
لأ هانكمل الدرس
لأ مش عايزين بقى زهقنا
بص يا مصطفى لو مش عاجبك اخبط راسك فى الحيط و مش هافرض عليك حيطه معينه المدرسه فيها اربعين فصل و الفصل فيه اربع حيطان يعنى قدامك ميه و ستين حيطه اللى تعجبك اهبد دماغك فيها ما حدش هايقولك بتعمل ايه
فى ايه يا ميس
مافيش حاجه اكتب بقى بدل ما اروحك البيت لماما بعين واحده
حاضر الطيب احسن
عالم ما تجيش غير بالعين الحمرا
عايزين ريا و سكينه تدرس لهم منهم لله

هههههههههههههه
والله اليوميات دى جميلـــــــــة والترم التانى شكلوو جامد
الله يكون فى عونك بس المرة الجاية ادخلى بالسكينة او المطووة
هددى بئة
ههههههههههه
الف شكر ياهند

شكرا شكرا بجد الترم التانى جميل اوى يا قمر

بس بجد العيال دى تزهق بلد هما بيعملوا كده بجد فى المدارس اه انا عارفه

متشكره اوى يا هند

يا سلام على يومياتك المجنونه دى ياهند

لو انا مدرس كنت انتحرت من زمان

رد ياحوس انت وكريزي علي رسايلي

زائر

ههههههههههه
تصدقى الترم التانى احسن من الاول

اسلام مقبل كتب:: هههههههههههههه
والله اليوميات دى جميلـــــــــة والترم التانى شكلوو جامد
الله يكون فى عونك بس المرة الجاية ادخلى بالسكينة او المطووة
هددى بئة
ههههههههههه
الف شكر ياهند

ههههههههههههههههههههه

دي حتي السكينه والمطوه مش هتاثر فيهم

ميرسي يا اسلام لردك ومرورك

نورت التوبيك

crazy girl كتب:: شكرا شكرا بجد الترم التانى جميل اوى يا قمر

بس بجد العيال دى تزهق بلد هما بيعملوا كده بجد فى المدارس اه انا عارفه

متشكره اوى يا هند

بيعملوا اكتر من كدا ههههههههههه

ميرسي يا قمر لردك ومرورك

نورتي التوبيك

7oss كتب:: يا سلام على يومياتك المجنونه دى ياهند

لو انا مدرس كنت انتحرت من زمان

ههههههههههههههههه

علشان بس تعرفوا انتوا كنتوا بتعملوا ايه في المدرسين

ميرسي يا حسام لردك ومرورك

نورت التوبيك

Nancy كتب:: ههههههههههه
تصدقى الترم التانى احسن من الاول

ميرسي يا قمر لردك ومرورك

نورتي التوبيك

سحس بمب

من يوم ما اشتغلت فى المدرسة و من اول يوم ليا و انا مش مرتاحه للراجل الناظر ده و لا بلعاه
و زى ما بيقولوا كده من القلب للقلب واضح انه هو كمان ما بيحبنيش
مشكلة الراجل ده ايه بقى
انه عايز يرسم نفسه على الكل العيال و المدرسين و كل اللى شغالين فى المدرسة
و انا سمى و موتى اللى يتنطط عليا
حاولت كتير افهمه ان لو كان هو قرد فانا مش شجرة
لكن ما كانش بيقتنع
كان دايما شايف نفسة و عامل فيها حاجه و هو مالوش فيها و الله العظيم
ده حتى العيال كانوا عاملينه تريقتهم بسبب انه بيتحشر فى كل حاجه اللى فاهم فيه و اللى مش فاهمه
بس كل المدرسة بقى كوم و انا كوم تانى
يتحشر فى شغل الكل لكن يجيى لحد عندى بقى و ستوب
لكن تقول لمين كان عامل زى القطر ما بيفرملش
المهم ان فى يوم داخله حصة بنات ما لقيتش اربعة من الفصل موجودين
هما نورهان و منه و رضوى و سلمى ماجوش النهارده
ما حدش رد
ما تنطقوا هما غايبين
لأ يا ميس رضوى بس اللى غايبة
و باقى الهوانم فين ان شاء الله
فى الفصل التانى
بيهببوا ايه فى الفصل التانى اتنقلوا
لأ بيحضروا حصة علوم
بيحضروا حصة علوم و النبى . ماشى يا سنه تالته ثانية واحده بس و راجعه لكم
دخلت الفصل التانى و اول ما شافونى حطوا وشهم فى الأرض
بعد اذنك يا مستر حضرتك عايز الهوانم
لأ يا ميس دول قالولى ان حضرتك مش هاتديهم حاجه النهارده
مش هاديهم ليه ده احنا لسه فى اول التيرم قومى فزى يا ماما انتى و هى
قاموا التلاته ورا بعض
دخلت الفصل جايين يدخلوا ورايا
رايحين فين
مش هاندخل
لأ تدخلوا فين اتلقحوا هنا على ما اخلص و افضى لكم
وهبدت الباب و جيت اكمل شرح
لقيت الباب بيتفتح و المحروس واقف لى معاهم على الباب
لو سمحتى يا ميس
لأ
هو ايه اللى لأ
مش حضرتك عايز تدخلهم الفصل لأ
لأ ليه
هو حضرتك عرفت هما عملوا ايه
اه و هما هايعتذروا لحضرتك و دى اخر مرة
لأ
لأ برضه يا ميس
أيوه لأ مش هايدخلوا و هايبقى يوم اسود على دماغهم ان شاء الله و مش هايحضروا لى حصص بعد كده
يعنى ايه
يعنى زى ما قلت
بس كده ما ينفعش يا ميس
مستر حضرتك بتعطلى الحصة عشان شوية جزم
يا ميس لو سمحتى من غير غلط
لأ هاغلط و هاديهم على دماغهم كمان
يا ميس بلاش التحدى ده
مستر بعد اذنك عندى حصة و على الله حيوانه فيكم تفتح باب الفصل و روحت هابده الباب فى وشه
انتى بتهبدى الباب فى وشى ماشى يا ميس ماشى يا ميس
العيال كلها بصوا لى و تنحوا
ميس
نعم
احنا هاناخد حاجه النهارده
اكيد امال هانضيع الحصه يعنى
طب حضرتك بس ما تزعليش نفسك
انتى شايفانى باعض فى الأرض و لا باشد فى شعرى
لأ ما تزعليش بس من مستر حسين ده راجل اهبل
من غير غلط عيب كده
انا قصدى يعنى ما تضايقيش نفسك علشانه
خلاص ما حصلش حاجه طلعوا الكشاكيل و ابتديت اديهم الحصة
شويه و لقيت الباب بيتفتح تانى
و فيه مستر طوله مترين واقف على باب الفصل و البنات معاه
خير يا مستر
يا ميس هما جايين يعتذروا لحضرتك
مش هاينفع يا مستر
لأ يا ميس هاينفع
باقول لحضرتك مش هاينفع
عشان خاطرى طيب
استغفر الله العظيم . يا مستر دى عيال قليلة الأدب و مش متربيه
يا ميس خلاص حقك عليا انا اعتذروا للميس
حضرتك مش واخد بالك ده انا لسه متخانقه مع مستر حسين بسببهم
هو كان بيزعق بسببك
اه
يعنى حضرتك اللى هبدتى الباب فى وشه
ايوان
حرام عليكى يا ميس ده صعبان عليه منك قوى و عمال يقول تهبد الباب فى وشى ازاى دى قد بنتى
يا مستر ما هو غاظنى . على طول بيدافع عنهم
طب معلش دخليهم دلوقتى و ابقى صالحيه بعد الحصة
اصالحه
يا ميس ده راجل كبير و مخه على قده
ربنا يسهل
طب البنات ممكن يدخلوا بقى
اوكى مش مشكله بس على الله تعملوا كده تانى مش عايزين تحضروا استأذنوا منى و غوروا فى ستين داهيه بعد كده لكن ما ادخلش تانى و ما الاقيكوش فاهمين
احنا اسفين يا ميس اخر مره و الله بس اصل الدرس كان صعب و الله و مكناش فاهمينه خالص
كملت الحصة و بعد ما خرجت لقيت ولد من اعدادى قدامى
ايه اللى عملتيه ده
ايه
سحس بمب هايطق منك
هو ماشى يسيح لى
لأ ما احنا سمعنا كل حاجه ده دور اعدادى كله سمع اللى حصل
لا يا راجل و ايه رأيك بقى
رأييى . دى هبدة الباب هزتنا فى الفصل . بالراحه شويه يا ميس المدرسه قديمه
طب خلاص روح على حصتك بقى
ماشى بس حاسبى لحسن يستناكى بره
احترم نفسك و روح على فصلك
ماشى يا جامد
لسه بالتفت لقيت ولد تانى
الباشا الكبير و المعلم بتاعنا اللى مثبت سحس بمب و اللى اتخن من سحس بمب
الله باشا و معلم هو انا مدرسه و لا باتاجر فى المخدرات
لأ جامده منك دى ده انتى كان ناقص ترزعيه بالقلم على وشه
خلاص بقى خلصنا
بس بيقولوا هاتترفدى الكلام ده صح
هو انا حد يقدر يرفدنى
يرفدوكى ده احنا نقفلها لهم انتى فاكره ما وراكيش رجاله و لا ايه ؟
ماشى يا حامى الحما روح على فصلك بقى
نازله المعمل لقيت زمايلى بيبصوا لى
فى ايه انتوا كمان
مافيش
لأ فيه
انتى ايه اللى عملتيه فى مستر حسين ده
يوووووووه هو انا ما واريش حاجه النهارده غيره
ده نزل حكى لنا و كان هايعيط حرام عليكى
هو انا عملت له حاجه
تهبدى الباب فى وشه قدام البنات و تقولى عملت له حاجه
طب هاعمل له ايه دلوقتى
اطلعى صالحيه ده كان متأثر قوى
ماشى انا برضه حاسه انى زودتها معاه ده العيال كلها بيقولوا لى ايه اللى عملتيه ده
هما العيال كمان سمعوا اللى حصل
هما العيال بس ده اعدادى كله عرف
لأ بجد بقى صالحيه ده راجل قد باباكى الله يرحمه
خلاص هاطلع له
جايه اطلع له لقيته فى وشى و بيبص لى و عامل نفسه زعلان
روحت ضحكت له ببراءه و قلت له بص بقى
قالى قبل ما تقولى اى حاجه على فكرة انتى غاليه عندى و ما كنتش متوقع تعملى معايا كده ده انا باحبك زى بنتى
يا مستر و الله انا كنت متنرفزه بسبب اللى عملوه بس حقك عليا
لأ يا ستى حقك انتى عليا عشان شخطت فيكى قدام العيال و تعالى اطلعى معايا الفصل
ليه
تعالى بس
دخلنا الفصل راح مطلع البنات التلاته
اعتذروا للميس يا بنت انتى و هى
احنا اسفين يا ميس
الميس عندى اهم منكم كلكم و على الله حد يزعلها تانى انتوا فاهمين و لو عايزه تعملى لهم استدعاء ولى امر كمان هاعملهم يا ميس
لأ خلاص يا مستر
المهم انك تكونى مش زعلانه
لأ زعلانه ايه ده حضرتك احرجتنى بذوقك و الله

المشكلة بقى انى لحد دلوقتى مش عارفه الراجل ده عايز منى ايه انا اتأكدت بعد الموقف ده انه سايكو رسمى من شويه يزعق لى و يشخط فيا و بعد كده يشتكى منى لطوب الارض و شويه و يعتذر لى يكونش عايز يجننى

المهم انه بعد الموقف ده شويه يكون كويس جدا معايا و يتعدل على الاخر و انتى احسن مدرسه عندى

و بعد كده الاقيه بينصر العيال عليا

بجد الراجل ده لخبطنى خالص ربنا يهديك يا سحس

زائر

شكرا علي مواضيعك وده عيب فكل المدارس

زائر

والله كل واحد تلاقيه بيحمد ربنا انه خلص الترم الاستاز احمد بيسهر طول اليل وييجي الصبح ميشرحش بيخلي التلامزه هما اءلي يكتبو ده ينفع والله الواضيع بتاعتك منوره المنتدي تقبلي مروري

ينفع المدرسه دى تيجى تدى لنا الحاسب الالى فى الكليه ؟؟

أنا بتهيألى هنعرف نتفاهم مع بعض شويه

الموضوع بصراحه جامد

ربنا يوفقك كمان وكمان

وتزدينا بالموضوعات الشيقه دى

بجد ربنا يكون في عونك انا لو مكانك كنت انتحرت من زمان يوميات مدرسه اجن من الطلبه - صفحة 4 Icon_biggrin

خدالموضوع بكل بساطه دول عيال في المدرسه

انت تدخلى بالعصاية وتهزئيهم

استغفر الله العظيم ايه الاجرام ده عصاية ايه بس

» يوميات محتار ومحتارة
» يوميات عمرو وياسمين